شهر (توت) هو أول شهر فى الأشهر القبطية (يعنى المصرية)

شهر (توت) هو أول شهر فى الأشهر القبطية
 (يعنى المصرية)

جحوتى فى صورته الرمزية (أبومنجل/ طائر Ibis)

عصر متأخر (664- 332 ق.م) – المتحف المصرى

 

 إحنا فى شهر (توت) أول شهر فى الأشهر القبطية، إللى هو أقدم تقويم معروف لحد دلوقتى

توت فى الأمثال المصرية بيتقال عنه:

اللى فاته عنب مسرى يلحق رطب توت

توت يقول للحر موت

فى توت روِّى ولا تفوت

وكل الأمثال دى مرتبطة بالطقس والمناخ وعلاقتهم بأحوال الزراعة وجودة المحاصيل.

بس مين هو توت ده؟

هو النثر [*] "جحوتى" واللى كان له صورتين رمزيتين فى الميثولوجيا* المصرية القديمة، صورة قرد البابون وصورة طائر أبو منجل 

والنثر جحوتى هو مبتكر الكتابة اللى علمها لأجدادنا القدماء، وهو المسؤول عن الأرقام والحسابات، وكمان هو سيد الزمان والوقت ومُقدر السنين وحسبها، واللى حسب وسجل سنين الماضى كله. وبالتالى كان المسؤول عن منح طول أعمار للملوك، وفيه ملوك نسبوا اسمائهم له، زى "تحوتمس" اللى هوا فى الأصل المصرى "جحوتى مس" واللى معناها حرفيا "ججوتى وُلد" أو بمعنى تانى "ابن جحوتى".

وجحوتى - أو توت بعد عملية تطور اللغة وتخفيف الكلمات القديمة - هو "رب قلم القصب" يعنى صاحب القلم اللى معمول من البوص، وكمان هو "المقدس ثلاث"، ودى تحديدا اللى منها جه الحلفان عندنا المرتبط بفكرة "التلاتة". وكمان مرتبته المقدسة بتخليه حلقة وصل ما بين العالمين؛ العالم الدنيوى اللى احنا عايشينوا والعالم الأخر اللى بينتقل ليه الانسان بعد الموت. وكما هو "كاتب ماعت" وكمان "رب الكلمة المقدسة". ده غير إنه "مانح الطعام"

ومن صفات "توت" إنه قوى وسطى ما بين الخير والشر؛ خصوصا إنه من القضاة أو المحكمين اللى بيحكموا الموتى فى مراحل الحساب، على حسب المعتقد الدينى فى مصر القديمة. وهو كمان كان راعى الكتابة والعلوم فى مصر القديمة؛ ودوره مهم جدا فى عملية تطور العلوم، وكمان ارتبط اسمه بفنون السحر وتطورها برضو

انتشرت قداسة النثر جحوتى فى ربوع مصر كلها خلال مختلف أزمنة التاريخ القديم، خصوصا خلال عصرى الدولتين القديمة والوسطى. وكان الرمز الرئيسى للإقليم رقم 15 (تونة الجبل والأشمونين – المنيا حاليا)، وممكن نعدد مناطق انتشار قدسيته فى مصر، زى انتشاره فى مناطق الدلتا فى الشمال، وفى سرابيط الخادم فى سينا فى الشمال الشرقى، وكمان فى واحة الخارجة. وفى سقارة لقوا جبانة فيها أعداد كبيرة من مومياوات قرد البابون وطائر أبومنجل، دا غير طبعا الجبانة الرئيسية فى تونة الجبل غرب الأشمونين.

فى الميثولوجيا[†] المصرية النثر "جحوتى" له مكانة جليلة وخاصة، لأنه مكمن أسرار العلوم. فمثلا فى قصة الخلق عدى "رع" النهر السماوى فى رحلته السماوية على أجنحة "جحوتى"، وعلشان الشمس تطلع فده بيتكرر كل يوم، لأنه "ابن رع" فى الميثولوجيا.

و"جحوتى" هو (اللى جاب التايهة) وكانت هى حتحور فى قصة هلاك البشر. وهو كمان كان الوسيط فى قصة الصراع بين "حورس وست"، وهو اللى عالج "عين حورس" لما فقعهاله "ست"،لإنه كان خبير بعلوم الطب، وهو اللى علم إزيس الطب.

ولأنه زى ماقولت "سيد الزمن والوقت" وتسجيل السنين وتحديدها؛ فكان طبيعى إن أول شهر فى السنة يكون بإسمه: (جحوتى) اللى بئت (توت) بعد تغيير حرف الكتابة القبطى/ المصرى.

---

[*]  النثر هو كائن نورانى، عادة بتترجم إما (الإله) أو (الكائنات الإلهية

[†] الميثولوجيا هى الأساطير، وطبعا دى مختلفة عن الخرافة، لأن الخرافة من أولها لآخرها من نسج خيال الإنسان، أما الأسطورة فهى قصص لها أصل حقيقى أو تاريخى، بس بسبب طول الزمن وبعده دخل عليها بعض خيال الإنسان